कविता : विश्वासघात

कोठे विश्वासघात होताना पाहतो,
मी न मग माझा राहतो ।
विसरुन सारे भान,
संताप तांडव नाचतो ।।१।।

का करावा कोणी,
विश्वासाने विश्वासघात? ।
नसेल मनात प्रेम वा काही,
उघडपणे सोडावी ना साथ ।।२।।

विश्वास शब्द छोटा,
प्राप्तिच्या अनेक वाटा ।
हलकाच जाता तडा,
काट्याचा होतो नायटा ।।३।।

कमविण्यास लागतो काळ,
टिकविण्यास त्याहून फार ।
गमविण्यास लागतो क्षण,
पार मोडून जाते मन ।।४।।

अग्निदिव्यातून प्रकटतो विश्वास,
आपलेच होती तयाने खास ।
नसेल जमत देणे विश्वास,
नकात करु विश्वासघात ।।५।।

---- जयराज